政壇：議員遲表態鬥扭擰
立法會下周三辯論引用《立法會（權力及特權）條例》，要求政府交出審批免費電視牌照時嘅相關文件。其實呢個議題都講咗好耐，支持定反對大家應該有晒立場，照計應該冇乜懸念，但偏偏有部分議員至今仍未定投票取態，仲話要到下星期先至決定。咁啱呢三名議員都係嚟自功能界別，點解佢哋咁扭擰？
設計圖片及對白
最尾先揭開底牌
今次免費電視牌風波，投票取態最備受關注一定首推體育、演藝及文化出版界馬逢國，話晒都叫業界關注議題，但奈何佢遲遲未有決定。
記者問佢支持定反對，佢又答得扭扭擰擰，話立法會唔係逼政府提交資料嘅最佳地方，最好應該由法庭決定喎。
另一位扭擰王就係醫學界「怪醫」梁家騮，佢最初明明講過會支持動議，認為政府應該公開相關資料，但點知尋日佢又自爆被西環「箍票」，仲話有西環官員「搵佢飲茶」，如果對方有充分理由，自己可能會改變投票意向，真係貫徹怪醫作風。
至於工業界林大輝就最識講嘢，佢就講得好動聽，話周五將約見商務及經濟發展局局長蘇錦樑，如果對方答覆未能令佢滿意，有可能支持泛民引用特權法。老實講，如果要反對動議嘅話就應該理直氣壯，佢哋唔應該咁扭擰，快啲表態好過喇，有乜好驚吖！尤其行政會議係實施保密制嘅，點可以話公開就公開嘅呢。
