行政會議不保密 管治隨時亂上亂
廉政公署嘅宣傳口號係「廉署保密，密密實實」，從來冇人質疑，但奇怪嘅係，更加需要保密嘅行政會議反而不斷受到挑戰，郁吓就畀人要求公開文件，問你服未。
嗱，早前港府增發兩個免費電視牌照，結果順得哥情失嫂意，名落孫山嘅香港電視質疑當局黑箱作業，有人要求解釋落選原因，有人要求交代審批過程，有人甚至要求公開行會文件，搞到滿城風雨。特首梁振英尋日再度回應事件，強調行會審批免費電視牌照時已考慮四大準則和十一項因素，秉承引入新競爭宗旨，按制度、法律、政策及程序公義作出決定；佢又重申行會一直實行保密制及集體負責制，具體細節不可公開披露。
即係咁，國有國法，家有家規，港府拒絕公開行會審批免費電視牌照具體細節，係無可厚非嘅，須知保密制及集體負責制唔係今日至開始，大大話話已有百幾年歷史，一直行之有效，如果郁吓就話要改變，咁仲成世界嘅？其實，唔止香港行會需要保密，全世界嘅政府都係咁，呢啲係基本原則，任何人都唔可以隨便破壞，否則政府就冇辦法運作，世界就大亂o架喇。試諗吓，如果行會討論係咪取消樓市辣招，過程完全公開，結果會點呢？又如果行會討論係咪取消聯繫匯率，過程唔保密，又會為金融市場帶來乜嘢後果呢？
再講喇，正因為行會有保密制，行會成員先至可以暢所欲言，發表意見，相反，如果行會取消保密制，大家有所顧忌，想搵人出謀獻策都幾難。
講起都幾諷刺，行會保密制及集體負責制實行咗咁耐，港英時代從未受到質疑，點知回歸後就不斷受到挑戰，尤其係近年經常有行會成員唔守規矩，大爆行會秘密，甚至公開同政府唱反調，令保密制及集體負責制形同虛設。呢，就講今次電視風雲吖，有人引述所謂「行會消息」，大爆內幕，疑幻疑真，搞到七國咁亂。
所以話，弱勢政府百事哀，同一個香港，同一套制度，回歸前後嘅效果完全唔同。有京官曾譏笑港產官僚唔識「當家作主」，真係一啲都冇講錯。正所謂，名不正則言不順，言不順則事不成，回歸前嘅港督府，回歸後改為禮賓府，堂堂特區之首變成「賓客」，九唔搭八，又點識得當家作主吖？唔怪得回歸咁多年，亂足咁多年喇！
計太一叮話齋，如果港府連行會保密制及集體負責制呢條底線都守唔住，咁不如索性解散甚至取消行會，由特首一個人決策，以免人多口雜，互拖後腿，咁反而可能有助提高施政效率吖，係咪！
