SUN搞作：打橫嚟講：一籃子廢柴事例
哈哈！原來唔單只那群每年出版「流年運程」嘅「神的代言人」亂噏開口中，想不到，我都得喎！上星期之嘛！我喺呢度講定「香港廢柴政府永遠做不來嘅十單小事」，其中之一，就批死佢哋對違例巨型招牌懸掛舊大廈外牆的處理，呢世都搞唔掂o架啦！哼！話口未完，就出……事啦！
前日，旺角彌敦道一個大招牌傾側，便令成個九龍區交通半癱瘓，那不特止，肇禍路面完全淪陷，還連帶港鐵亦遭殃。家陣，全港交通運輸鏈環環相扣，一方有難，八方牽連，尤其是旺角係港九新界的最中心樞紐，呢度賴嘢，大家仲邊度有路行？
幸好，只是似北京上海咁塞塞車，無發生意外，亦無人命傷亡啫！阿彌陀佛！
從呢劑「招牌門」，卻讓全港市民又多了解一點香港垃圾政府之廢庸及內部行政之PK。
負責拆招牌的屋宇署，因政府政策低能，幾年來一直都人手不足，前線員工有開工無收工；怪不得，又係由屋宇署負責清拆的違法劏房，肆無忌憚咁，被揭發也無有怕，大可繼續經營，日日收租啦！原來竟無人去「執法」！
香港庫房的儲備，足夠買起成個「阿魯瓦圖」，咁何解請多幾個三十三蚊一個鐘嘅工友，都咁多阿芝阿佐o架呢？
究竟年薪幾百粒嘅高官，你哋知唔知前日彌敦道咁塞一塞，香港損失咗幾多呢？
呢頭唱人佔中影響經濟，嗰頭拾吓拾吓，任由招牌吊吊揈，簡直係一籃子廢柴！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
