SUN搞作：少膽虫手記：撞門
「有乜新聞可以作大呀，菜大記者？」少膽虫循例問吓菜嫌貴《爛果》頭條做咩啦，佢就數白欖咁答：「菜價上漲啦、元朗菜心失收、菜欄後欄起火……」「喂喂喂！」少膽虫打斷佢，「我知你關顧民生、嫌啲菜貴，但係奈何唔夠鹹得嚟又唔煽情呢！」
「咁鹹菜致癌呢？」菜嫌貴鍥而不捨，但少膽虫堅持《爛果》立場。「咁呀……」菜嫌貴思索一陣再話：「咁做撞車啦！」少膽虫火都嚟：「挑！撞車都好做？o架車係乜車呀？寧波車呀？」
「罪過罪過！有怪莫怪，少膽虫唔識世界！」菜嫌貴立即合十祝禱，然後黑口黑面咁話：「腦腫，唔係寧波，係北京！仲撞埋門添！」少膽虫向來昧於時事，唔知佢噏乜，繼續傻更更：「門？門大定門小？前門定後門……」一說曹操，少膽虫就感到身後被頂一下……
「少膽虫！北京嗰單嘢你仲未知？」淫賤黎咆哮：「着晒火呀嗰棟門！」少膽虫偷偷地問菜嫌貴：「即係邊棟……」菜嫌貴鬼祟祟回答：「咪廿幾年前乜事都無發生過嗰棟門囉！」少膽虫一聽，已有打算，決定要將形勢逆轉，喺淫黎面前立功：「腦細！我梗係知啦！嗰度出名無死過一個人，我哋話佢死好多人，咁《爛果》咪好賣得囉！」淫賤黎淫顏大悅。
