城中鏡：劉雪文教仔不溺愛
嬌生慣養、父母溺愛促成港孩、港童現象，呢個問題大家都重視，但唔少城中父母卻未必知道點樣可以改善教養之道，智樂兒童遊樂協會日前喺金鐘一間酒店舉行慈善晚宴，晚宴籌委會主席劉雪文（Michelle）忙工作之餘，都好重視三個小朋友嘅成長，佢慨嘆，時下部分家長當子女係「玻璃」，過分溺愛同保護，咁樣對佢哋未必係好事。
劉雪文（右）與林李婉冰（左）齊擔任晚宴籌委會聯席主席，希望幫助更多小朋友。
身為三子之母嘅Michelle話，佢會鼓勵兒子學騎馬、冰上曲棍球，等佢哋喺跌跌碰碰中成長。成長中歷練傷痛外，Michelle仲會帶兒子到深水埗探訪露宿者，等佢哋明白幸福並非必然，佢嘅方式既可以畀兒子睇多啲嘢，亦可以刺激佢哋眼界闊啲，體會自己階層以外嘅事，對兒童甚至青少年絕對係好事。
