城中鏡：肥亨大女恨做媽咪
本港生育率低，政府都要研究提供誘因鼓勵市民生仔，前年出嫁嘅商務及經濟發展局前局長馬時亨大女馬露明（Christine），日前同醫生老公劉仲恒（Kevin）手拖手齊齊出席一個活動，佢話渴望做媽咪，仲同老公有默契，隨時準備迎接新生命來臨。
馬露明（左）同老公劉仲恒（右）好鍾意旅行。
Christine被問到幾時升級做媽咪時，甜絲絲望住老公話：「我哋幾時生BB？」兩個人嘅互動既甜蜜又窩心。其實，Christine結婚第一日起，已被爸爸催促佢努力「造人」，而佢同老公都鍾意小朋友，似乎一切已經在計劃中。早前佢哋兩夫妻先去咗北京同美國玩，嚟緊聖誕又打算去泰國清邁，過足二人世界癮。同場仲有大家樂集團主席陳裕光千金陳浩寧（Candice）同夫婿趙益坤，講起七個月大嘅兒子Logan就甜到漏喇。Candice今次亮相已經極速收身，但佢又準備懷孕，希望盡快三年抱兩，為兒子添個伴。
