政壇：搞搞政：郎朗任聯合國和平使者
音樂係世界語言，亦係最能夠觸動人心嘅一種藝術之一，聯合國秘書長潘基文前日親自向華裔著名鋼琴家郎朗頒授任命狀，委任佢擔任「聯合國和平使者」，三十一歲嘅郎朗既係聯合國最後生嘅和平使者，亦係繼知名華人大提琴家馬友友之後，聯合國另一位華人和平使者。
設計圖片
以音樂感動聽眾
憑鋼琴蜚聲國際嘅郎朗近年熱心公益慈善事務，潘基文向佢頒授任命狀時，都大讚郎朗做聯合國兒童基金會親善大使時，經常以音樂感動、鼓勵世界各地聽眾去改善兒童生活，希望郎朗做咗和平使者後，繼續以音樂宣揚和平同幫助聯合國拓展公眾認知，郎朗在現場演奏咗《蕭邦1號圓舞曲》及中國樂曲，佢仲話，對於今次獲任命感到榮幸，會盡最大努力為聯合國作出貢獻。睇嚟，肩負和平大使重任嘅郎朗嚟緊必會更忙！
