立法會議員經常收到市民投訴，並會按情況予以跟進，好多時幾個政黨跟進同一個案都唔出奇，不過，一個政黨有兩位議員咬住同一議題就等於自相殘殺，公民黨最近就有件同類個案，陳家洛同郭家麒分別跟進違規冰鮮肉店個案，究竟兩人係不和爭風？定係該黨中人個個都零溝通呢？

陳家洛（左）同郭家麒分別跟進違規冰鮮肉店個案。

申訴專員公署早前抽查四十六間街市冰鮮肉店，結果發現逾六成店舖違規，未有將冰鮮肉放喺冰凍設施，甚至將冰鮮雞當新鮮雞出售，負責嘅食環署執法不力，只簡單發出口頭警告了事。由於呢單嘢涉及大批市民，陳家洛、郭家麒同一時間收到市民投訴並唔出奇，但係照計作為一個政黨，各議員分工應該清清楚楚，可能你負責房屋運輸議題、佢負責醫療衞生等。

點知兩人好似零溝通咁，陳家洛先喺十月二十四日去信食物安全及環境衞生事務委員會，要求委員會跟進事件，事隔兩日就到郭家麒發信。兩封信唯一唔同之處，就係後者要求加開特別會議，前者無提過。呢件事唔止反映好多市民關注凍肉舖違規，仲反映該黨內部運作好混亂囉！

第一手消息請下載on.cc東方互動iPhone/iPad/Android/Windows Phone Apps