政壇：兩區勢補選各政黨吼實
區議會補選停不了，未來半年可能再有兩個選區要補選，分別係離島東涌北及東區南豐選區。據聞，各大政黨已對議席虎視眈眈，仲諗定「備選」陣容，靜待議席出缺成為事實。最終建制派或泛民主派邊方選贏，肯定對二○一五年區議會換屆選舉有利，而補選亦可作為區選前哨戰。
有地區消息話，屬於中產選區嘅離島東涌北選區由於當區區議員林悅捲入一宗官司，雖然未知最後有乜結果，但據聞泛民同建制派政黨已經落區做定工夫，包括派人跨區做街站，以及搵定專業人士做「替補」。此外，據聞有前離島委任區議員接連針對中產議題發聲，似有異動，似乎有意染指埋一份。
至於東區南豐議席方面，當區區議員、民主黨梁淑楨今年初嚴重中風後，建制同泛民各大政黨「插手」當區事務愈來愈明顯，梁淑楨雖繼續向東區區議會請假，然而本月初東區區議會閉門商討後，通過不再接受梁淑楨嘅請假申請。根據《區議會條例》，區議員若未得區議會同意而連續兩次缺席區議會大會，就會喪失議員資格，意味該區可能要補選。
