政壇：樹根諷政府 搶地如搶親
政府被批盲搶地，有時嘅藉口係搵地起公共房屋，有時就話要保育。立法會一小組委員會尋日討論政府將西灣、金山及圓墩的三幅土地納入郊野公園範圍，漁護署同環保署兩名官員喺會上大講理據，話塊地具好高嘅景觀同康樂價值，列作郊野公園後，政府可以增設露營、康樂設施吸引遊人，村民仲可以做啲小生意喎，不過佢哋嘅利誘卻遭到議員質疑，建仔鍾樹根更以搶親作比喻：「唔通人哋靚，你就娶佢做老婆喎，咁唔得o架嘛﹖」
設計圖片及對白
鄉局代表促暫停討論
就呢個修訂，有西灣村居民入稟法院申請司法覆核，鄉議局相關小組代表亦質疑政府偷步，欲搶先在法庭判決前製造既定事實，希望立法會暫停討論修訂。立法會《2013年郊野公園（指定）（綜合）（修訂）令》小組委員會尋日舉行首次會議，環境保護署助理署長區偉光喺會上話，土地納入郊野公園須合乎保育、康樂、景觀及與郊野公園脗合程序等要求，強調當局唔係收地，靈活性仍然存在，現有村民仍可申請建丁屋，而是基於管理問題。
佢強調，西灣村的景觀及康樂有「非常高」的價值。漁農自然護理署副署長梁肇輝亦話，有關土地納入郊野公園後，政府會改善當地環境，如建露營等旅遊設施，從而帶旺人流，對村民有長期幫助。鍾樹根卻質疑政府此舉猶如強搶民地：「點解一定要納入郊野公園，而唔可以入規劃大綱圖？唔通人哋靚，你就娶埋佢做老婆喎，咁唔得o架嘛！」另一議員盧偉國也表示，睇唔到政府能說服村民嘅理由。同樣出席會議嘅鄉議局相關小組代表巫家雄就質疑，政府偷步向立法會提出修訂，呼籲立法會暫停討論。
