醫保藥石亂投 硬銷不如早抖
醫保醫保，衰到無譜。前朝曾蔭權政府兩度為自願醫療保險計劃推出諮詢，兩次都畀市民炳到七彩，家陣輪到今屆政府上陣，受靶情況會唔會冇咁慘烈呢？唉，睇嚟又係醫番都嘥藥費嗰隻。
食衞局局長高永文話喎，醫保方案最快年底公布，其中住院保險會設立最低水平要求，預料保費會上調一成，但與此同時，政府會考慮提供稅務優惠，吸引中產人士購買喎。至於高風險人士可能無法投保問題，政府或會設立高風險池，注資協助高風險人士加入，但會設時限咁話。
你話係咪九唔搭八吖？醫保計劃本來已經畀人鬧搵笨，依家仲話要加價，即係食水仲深咗。公共醫療係中產唯一福利，當局用雞碎咁多嘅稅務優惠，就想氹中產落疊，發夢冇咁早啦。其實，醫保計劃不斷改頭換面，一時強制性，一時自願性，一時稅務優惠，一時風險池，其實萬變不離其宗，換湯不換藥，就係要打劫市民，推卸公共醫療責任，唔畀人炳到變豬頭至奇吖。
仲有吖，港府啱啱先至公布人口政策諮詢文件，煞有介事警告本港人口急速老化，銀髮一族愈來愈多，但係醫保居然對高風險長者諸多設限，摒諸門外，咁咪即係本末倒置？係人都知，年紀大機器壞，佢哋至係最需要醫保一群，可惜醫保嫌老愛少，由始至終對老人家百般刁難，一味「利誘」中產同年輕人自願性誤墮圈套，成個計劃獲得最大保障嘅根本唔係市民，而係保險公司同私家醫院！
可以咁講，醫保計劃先天不良，後天失調，今屆政府無論點改頭換面，都改變唔到推卸公共醫療責任嘅本質。正所謂，見過鬼怕黑，當年港府硬銷強積金，結果係天仙局，市民上過一次賊船，唔會再上當o架嘞。如果港產官僚真係咁得閒，諗計整頓醫管局，改善公共醫療服務仲好啦，簡直唔衰攞嚟衰！
有時真係唔知今屆政府諗緊乜。前任食衞局局長周一嶽縮骨卸膊，庸碌無能，就話搞出一個以民為笨嘅醫保騙局，靠害市民啫，本朝官員何必陪佢癲？自己知自己事，今屆政府風雨不斷，弱勢捱打，不得人心嘅醫保計劃再拎出嚟獻世，盞自製炸彈，自找麻煩嘅咋！
最後，太一叮想提醒多高局長一句，如果閣下真係一意孤行硬推醫保，最好第一時間為自己投保一份，事關你嘅高民望隨時跌到五勞七傷，落到人人喊打嘅下場，叮！
