SUN搞作：少膽虫手記：唔好乜都賴樓價
「少膽虫，我喺你度匿番三兩個月，無問題啩？」淫賤黎嬉皮笑面咁問。淫賤黎賣地賣到就嚟賣埋祠堂，黎氏族人都深感不滿，紛紛要刮佢出嚟，要佢向列祖列宗認錯。點知佢居然橫蠻到要奪我家田─想避到我少膽虫屋企！淫賤黎出晒聲，少膽虫點敢Say No，只好奉勸：「腦細，我驚你住唔慣劏房咋！」
「劏房？」淫賤黎大驚失色：「我畀你喺壹全霉蛀米咁耐，你依家都係住劏房？」少膽虫感慨萬千：「你唔好睇我食個lunch都咁豪，嗰啲係充撐壹全霉腦腫嘅場面咋。」淫賤黎聽完，竟然更加有興趣，堅持拎晒行李要去，少膽虫惟有就範。
去到樓下，淫賤黎見到個屋苑大門寫住「岸九．居庭」就話：「又話劏房嘅？都住得唔差吖！」少膽虫只好搖頭唔出聲。「岸九．居庭」每座用啲龍、虎、豹、鳳命名，少膽虫就帶咗淫賤黎上「鳳樓」，但見大堂金碧輝煌，淫賤黎個心已經諗緊等陣點懲罰少膽虫講大話。
終於，一打開門，就係少膽虫張床尾，床頭貼晒啲寫真，牆上掛住好多玩具。「你……你間房咁暗嘅？」淫賤黎難以置信：「真係無咩空間喎！」「鬼咩，市建局都起劏房，呢度值成千萬喇！」少膽虫百感交集：「咪當訓練自己想像力，幻想吓喺法國康城海邊大屋囉。」
「幻想係要幻想，不過唔好乜都賴晒樓價高！」淫賤黎泛起淫笑：「就算無廚房都得啦，何況可以向高空發展，我上你下o架！」淫賤黎指住窗口對面屋張雙層床。
