城中鏡：李民橋落水 五分鐘抽筋
天氣轉涼，去沙灘游水前冇做足熱身，有時真係貽笑大方。東亞銀行副行政總裁Adrian李民橋尋日參加喺淺水灣舉行嘅慈善泳賽，點知落水五分鐘就抽筋，要勞動五個救生員飛身撲去拯救，認真勞師動眾。
李民橋（右一）落水五分鐘就嗌抽搐，要勞煩幾個救生員救人。
李國寶（右）所用嘅名牌旅行篋，寫咗佢個名。
尋日着晒長袖泳衣長褲保暖嘅Adrian，賽前未見異樣，可惜一落水就露出痛苦表情。救生員見唔對路，極速用救生艇埋去救人。抽筋嘅Adrian腳都軟埋，要五個大隻佬扶佢坐上救生艇。埋到岸邊時，立即坐喺沙灘上猛用毛巾抹面。
李國寶篋上刻名
阿仔晨早游水「甩碌」，佢父母舉止一樣令人嘖嘖稱奇。東亞銀行主席李國寶同太太潘金翠尋日下午一點從外地返港，行機場貴賓通道離開。兩人前後腳步出，着上紅色羽絨嘅潘金翠面露微笑先行步出，西裝骨骨嘅李國寶就黑面跟尾。二人出門共用一個細篋，但就分兩部車走人。
李國寶乜都寫名，○二年去巴黎被揭婚外情，就係因酒店房門外對鞋寫咗佢個名而證據確鑿，尋日名牌篋上都有佢嘅英文名David Li縮寫「D Li」。
