城中鏡：教愛妻游水 單日堅唔敢鬧
尋日喺淺水灣舉行咗一場游泳比賽，邀請到一眾商界精英、紀律部隊成員同立法會議員落水切磋泳技。雖然個個都換上泳褲化身游泳健將，但入境處處長陳國基同懲教署署長單日堅就翹埋雙手企喺旁邊觀戰，陳國基話雖然自己鍾意游蛙式，但就游得非常之慢，擔心落水比賽會拖累入境處隊戰情，所以都係寧願留喺岸邊做吓啦啦隊就算。
單日堅夫婦尋日齊戴黑超恩愛到場。
陳國基話所有入境處嘅職員都要識得游水。
立法會五名議員尋日都順利游畢全程，左起鍾國斌、胡志偉、吳亮星、馬逢國同梁繼昌。
立會飛魚鍾國斌奪冠
陳國基話所有入境處職員都要識得游水，皆因佢哋有時會上船為船員辦理入境手續，萬一途中跌咗落水，都要識得游返上岸，又話即使職員入職前唔識游水，入境處都會為佢哋提供特別訓練，確保佢哋出學堂前一定學識游水。
單日堅就話自己習泳多年，年輕時仲主動教未嫁入單家嘅女朋友學游水，但當年自己對女友呵護備至，唔敢大聲黑面鬧對方游得唔好，所以搞到太太學足咁多年，泳術依然係「有限公司」。
上月有份參加維港渡海泳嘅五位立法會議員，尋日都有落水幫手籌款，立法會「飛魚」鍾國斌再次以八分十七秒力壓其餘參賽者，勇奪「領袖邀請賽」冠軍殊榮，體文界馬逢國同金融界吳亮星亦都順利游畢全程。會計界梁繼昌話，淺水灣嘅水質比維港好得多，今次參加者人數又無上次咁多，令佢游起上嚟非常舒服。
議員「田二少」田北辰經營嘅服裝零售店亦有派員參賽，佢同兩個女亦有到場支持，田二少話自己泳術雖然唔係好得，但勝在有兩位新女婿做「外援」幫佢落水游，又話當女婿們知道要上陣同其他企業精英較量後，即刻晚晚走去泳池練水，希望為外父贏得獎牌喎！
