政壇：搞搞政：議員修訂悶夾繁梁繼昌促「減廢」
立法會會議又悶又長氣，好少市民有興趣聽辯論內容，好似上周一個改善旅遊業嘅動議辯論，明明冇乜爭議性，但為咗博出位，就有十位議員提出修訂，每人嘅修訂閒閒哋二百幾字，內容又悶又重複，搞到成個辯論只係讀啲動議同修訂字眼已浪費好多時間，所以會計界議員梁繼昌就希望限制時間，以免增加「廢話」流量。換言之，即係「減廢」喇！
設計圖片及對白
雖然梁繼昌唔係《議事規則委員會》委員，但佢最近寫信畀委員會主席譚耀宗，希望藉限制動議字數加快會議程序。正當佢擔心呢個建議會被建制派否決時，估唔到連譚耀宗都點頭讚好，話咁做可以令會議節奏加快，值得喺委員會商討一下。
呢項建議未正式討論，但以佢所知唔少建制派都支持，只要泛民肯傾，通過機會唔細。佢翻查過回歸前立法局辯論，無論動議定修訂字眼都好精簡，唔會水蛇春咁長，認為呢個建議有助提升議政質素，縮短開會時間，亦唔妨礙議員發言次數，估計泛民同事冇理由反對。
至於佢第二個建議就係唔准「議員修訂其他議員嘅修訂」。即係話，以後各位議員只可就主體動議修訂，而唔係阿A議員修訂阿B議員個修訂，咁樣唔止簡快審議程序，而班大頭蝦議員咪唔使驚投錯票。但由於呢個修改涉及議會傳統，未必獲泛民建制議員支持。
