胡志偉喺舊年嘅立法會九龍東選區,接替「肥仔明」李華明並成功當選,志偉觀塘和樂邨嘅議員辦事處尋日舉行開幕禮,點知發生烏龍事件。話說肥仔明畀面做嘉賓,但係佢襟前個嘉賓牌就寫住「李明華」,佢仲要戴足成程都唔覺,直至我哋提醒佢先恍然大悟,唔通呢個世界真係「人一走,茶就涼」?志偉就兜番係職員無心之失,仲講笑話掉轉用英文讀個名就啱嘞!

胡志偉(右三)尋日議辦開幕,搵咗李華明(左二)主禮,點知甩轆,名牌寫咗「李明華」。

胡志偉開金口唱歌

志偉話白鴿黨喺觀塘剩低兩個議席,所以要開番自己喺呢區嘅首個議辦,希望回復昔日光彩咁話。為咗留住啲老街坊,佢仲大開金口唱番兩首舊歌與民同樂,但佢坦言唔係唱得幾好,又唔識唱新歌,不過工多藝熟,十足十佢落力嘅性格。

至於肥仔明尋日就好似返咗主場咁,好多街坊捉住同佢傾偈影相,佢話九一年已經喺同一條邨開議辦,所以尋日算係返娘家,居民同佢關係唔止選民,有啲娶新抱嫁女都搵佢飲添,希望志偉唔會呷醋喎!

第一手消息請下載on.cc東方互動iPhone/iPad/Android/Windows Phone Apps