政壇：栢志高三次Say No
貪曾前特首曾蔭權爵士喺○七年時，直接「柯打」時任香港駐歐洲聯盟特派代表、現任運輸及房屋局常任秘書長栢志高幫佢約見教宗，之後就發生魔鬼交易醜聞。不過，栢志高多次被問及貪曾落「柯打」嘅過程同事件細節，佢都唔肯答，尋日佢以運輸及房屋局常秘身份出席山頂一個步行活動時，記者三次問佢有關問題，佢都Say No唔答。
設計圖片及對白
如何落柯打成謎
雖然商務及經濟發展局局長蘇錦樑上周三已出面為事件解畫，力證貪曾當時並無受到引誘，甚至取消埋出訪歐洲，婉拒其「好意」添，但仍然疑點重重，尤其係栢志高前上司馬時亨早前就話對事件不知情，而一開始「貪曾」如何跳級直接「柯打」栢志高辦理私人事務，又係一個不解之謎。「魔鬼交易」中誰是魔鬼、誰又是擅動邪念的凡人？
栢志高尋日出席兒童心臟基金會慈善步行。作為基金會榮譽顧問之一嘅佢，同愛妻拍拖現身大晒幸福，喺活動上仲非常活躍，見到得意趣致嘅小朋友都不停大揸相機影相留念，最後仲同老婆身體力行，行晒成條步行徑兼無氣喘添！
以為心情靚爆鏡嘅佢已經卸下「武裝戒備」，肯同傳媒閒聊，順道「博佢」會開腔回應事件。殊不知只係問佢「得唔得閒傾兩句？」就已經畀佢兩度耍手擰頭「Say No」拒絕，最後記者決定單刀直入請佢回應「魔鬼交易」一事，佢一聽到Donald Tsang（曾蔭權洋名）呢幾個敏感字眼，仲即時彈出一句「Of course not!」（絕對不！）避談，更報以一聲冷笑，隨即便與嬌妻直奔赤柱商場，消失於人群當中。
老實講，如果佢早啲向貪曾Say No，拒絕貪曾嘅「柯打」，咪唔使搞到一身蟻，到今日仲煩緊囉！
