港爸媽穿黑衣抗議盲搶位
幼稚園搶位潮停不了！上水粉嶺幼稚園先後被雙非學童攻陷，在一二年出生的龍B效應下，明年報名搶位情況勢必加劇。教育局於北區、大埔推「六招」補鑊措施抗搶位，三百名港爸港媽昨身穿黑衣參與集會，抗議措施未能確保原區入學，當局漠視本地家長訴求。明年加入搶表戰團的龍B爸媽已急謀對策自救，有港媽準備搬離北區，堅拒瞓街搵學位；亦有居於屯門的龍B媽媽已跨區至荃灣報讀下年入學的學前預備班（PN），以求原校升讀幼兒班（K1），避過搶位潮。
約三百名港爸港媽集會抗議教育局未能確保本地學童原區入學。
媽媽抱着BB手持標語牌抗議。
學童也來抗議，身上掛着諷刺當局的標語。
好擔心
劉太（居於上水）
已經預咗出年要加入戰團，出年可能要排兩星期，已準備去元朗、甚至荃灣搵學校，最差情況要一個讀上午校、一個讀下午校先接送到。
丘太
個女係龍B好擔心，唔想去咁遠讀書，依家上網睇定資料，為出年做準備。
幼稚園搶位問題早前激發數百名港爸港媽上街，教育局隨即推出「就近入學」及「一人註冊一校」的補鑊措施應對，但不少家長批評措施有漏洞，難以確保本地學童可原區入學。上水粉嶺媽媽會及香港教育專業人員協會昨舉行集會，約三百名港爸港媽高呼「六招無效、整死學校」、「學位失衡、政府無能」等口號，抗議教育局處理學額規劃時只見步行步。立法會教育事務委員會今日討論幼稚園學位問題，教育界立法會議員葉建源要求教育局承諾本地學童原區入學，如未獲回覆，不排除動議譴責。
感心寒拒原區讀書
在龍年效應下，本港一二年的出生人數逾九萬一千名，當中二萬六千七百多名為雙非嬰，比例接近三成。這批龍B將於一五年入讀K1，明年報名，排隊撲位潮勢必重現。居於上水的梁太育有一名龍B女，她坦言為求得學位已計劃搬至屯門區，「今年咁搶法，心都寒，點都唔會留喺上水區讀書，希望屯門易入啲，但係聽聞屯門有媽媽報咗三十間幼稚園，真係好誇張！」
為避過龍B入學潮，不少家長已提早搶位，為龍B報讀多間幼稚園PN班，勢要成功入學以求原校升讀K1。屯門區媽媽會代表區小姐指，今年屯門區已出現人龍搶表，有幼稚園表示申請大幅增加三倍至七百多份申請，創歷年新高。她擔心明年情況更嚴峻，已為龍B報讀六間幼稚園PN班，半數屬荃灣區。她透露上月曾與教育局分區代表開會反映家長憂慮，但教育局未協助解決問題。她要求於屯門區同時落實「六招」：「真係火都嚟，開會時用兩年前數據敷衍我哋，出年係人都知龍年多人，你話估唔到跨境學童人數，點解仲有一年都唔做吓調查？」
