SUN搞作：網絡小說：中產絮語
人口政策出爐，鼓勵生育同埋婦女重返職場，但係好多家庭月入兩萬幾就自命「中產」嘅人好不滿無支援，要求減稅、增加免稅額、源頭減人等等，仲好鍾意搬自由市場出嚟講、要政府少啲干預添。因此兩位中產先生就不約而同，一齊去政府總部示威喇……
中產先生甲：「減稅！減稅！」中產先生乙：「趕走雙非！」中產先生甲：「係囉！雙非無交稅！趕走佢哋！」中產先生乙：「生唔到仔，最衰都係貪曾！」中產先生甲：「ＢＢ無便便，最衰都係貪曾！」
中產先生乙：「吓，屙唔出都可以賴貪曾？」中產先生甲：「梗係關佢事啦！ＢＢ無奶飲，邊會有便便？」中產先生乙：「阿生你又講得幾啱，睇嚟你真係同我幾啱key喎！」中產先生甲：「係囉，不如一齊去飲杯咖啡、睇場法國戲吖！」
中產先生乙：「好呀，不過唔好睇咩《孤星淚》呢啲啦喎，呢啲片啲人整埋啲街壘，講打講殺，好唔和平理性囉！」中產先生甲：「當然啦，教壞細路，好地地搞咩革命?！」中產先生乙：「咪係，搞埋啲罷工阻住經濟發展，累街坊！」中產先生甲：「家陣請個外傭竟然要四千蚊喎，請完我老婆都搵唔番咁滯！仲罷工？頂！」中產先生乙：「家陣想去充滿英國才子佳人風情嘅九龍塘尋覓理想都唔得，唔通真係要搵立會元秋開房？」中產先生甲：「吓！？」中產先生乙：「講錯，係搵佢開嘅時鐘酒店……」
「挑！咪嘈啦！」兩位阿叔喺戲院愈講愈大聲，隔籬觀眾忍唔住講：「扮咩中產吖！問吓人工幾時有得加仲好啦！」
