SUN奇古怪：SUN潮語：【私片】

菲律賓人質事件又有最新發展，馬尼拉市長埃斯特拉達，打算代表馬尼拉市，向香港道歉，並且傾吓啲賠償問題點樣搞。特區政府收唔收貨依家仲係未知之數，不過作為一個普通香港市民，就肯定唔會就咁算數。因為呢次派個市長嚟道歉，係菲國三世祖總統另一次矮化香港嘅陰招。香港喺一國兩制之下，顯然唔係中國一個普通嘅城市，特區政府嘅地位理應同大陸一般市政府係有分別嘅，而喺國際上香港同其他國家開會，都佔有一席位。菲國今次派個市長人物嚟道歉，查實即係打算係市與市之間嘅溝通，完全唔關菲律賓政府事，同菲律賓大部分嘅國民無關。講得白啲，即係菲國三世祖總統始終係睇我哋香港唔起。唔怪得之上次特首去同佢「私片」嘅時候，安排座位明顯唔係平起平坐，係要高你一個Level。之後仲要同國際傳媒講：「而我不知梁振英是誰。」呢場「私片」，特首擺明畀人過咗一戙。

籃球有種玩法叫One on One，或者以前有個電腦遊戲《三國志》中，亦都有兩個武將「單挑」，雙方士兵作壁上觀，任由兩位勇士「私片」。呢句潮語本來應該係社團術語，因為「片」其實即係用刀去「片」人，「私片」就係話私人恩怨，二人就以決鬥「私了」大家的事情，而不涉及其他人。後來「私片」慢慢成為潮語，當然多數都係朋友間開玩笑居多，所謂「私片」可能只係大家猜枚玩骰盅飲酒嘅時候「私片」，絕對係和平理性非暴力。

最近立法會主席曾鈺成喺一個研討會度大談民主，佢仲話會撐無篩選嘅特首選舉。雖然佢話無諗過選特首，不過佢會唔會係趁現政府民望低而搵人「私片」？就不得而知啦。