政壇：搞搞政：大爆病人私隱周一鑊冇醫德
做人要有口德，做醫生更要有醫德兼口德，不過出身醫療界嘅平等機會委員會主席周一嶽（周一鑊）就似乎兩者都欠奉，佢尋日出席第六屆香港性文化節開幕禮時，就不惜大爆曾經向佢求醫人士嘅事，話有病人因性生活太激烈而整冧咗張碌架床，一家三口搵佢求醫。
設計圖片及對白
周一鑊尋日話，自己做骨醫時曾經遇過一宗求醫個案，話說嗰家人住公屋，父母同阿仔瞓同一張碌架床，點知瞓上格床嘅父母性生活太激烈，搞到整冧咗張床，以此佐證本港居民性生活空間狹窄。爆病人私事之外，佢又話，自己喺傳統家庭環境長大，冇人向佢灌輸性知識，搞到後來都唔知點教個女，點知囡囡醒過佢，同佢講：「唔使教喇，自己知喇！」
十月尾「哈佬喂」將至，周一鑊尋日又唱歌嚇大家，喺台上同香港性教育促進會副會長吳敏倫合唱《難為正邪定分界》，仲戴埋黑超扮魔鬼，唱到賴係high咁，只可惜佢個樣同把聲實在太驚嚇，叫佢宣傳性文化，真係擔心啲人被佢嚇窒囉。
