政壇：民主扯上夜生活 阿人攞嚟衰
佔中議題擾攘多時，正反陣營都打緊形象戰，但佔中發起人之一嘅朱耀明牧師早前同工黨李卓人等去台灣，仲同台獨領袖人物施明德會面、交流，令到本來佔中活動扯上台獨。佔中搞手連日認衰，尋日輪到戴耀廷承認佢哋真係敏感度不足，但佢哋劃清界線嘅動作已令形象大跌，李卓人尋日出席電台節目時用「想同民主拍拖」作輕鬆形容，點知畀出席同一活動嘅建制派窒番，話香港同中央要建立互信就好似拍拖嘅男女咁，本應該建立互信，但其中一方多夜生活，咁互信好難產生噃。民主扯上夜生活，阿人真係攞嚟衰。
設計圖片及對白
台北市癱瘓重演？
阿人尋日喺電台節目回應引進台獨勢力嘅指摘時，直言被「扣帽子」，話佢同民主拍拖嘅目標就係要爭取普選，不過佢嘅浪漫比喻，卻遭到出席同一活動嘅建制派李慧琼還擊，佢話，依家係政改諮詢嘅敏感期，有關人士嘅台灣之行難免引起中央高度戒心，對爭取普選有百害而無一利，佢仲食住上以男女拍拖甚至議婚為例︰「一男一女建立互信、準備談婚論嫁嘅時候，個男仔同女仔講我唔鍾意你咁多夜生活、可能又唔鍾意你蒲吧啦、唔鍾意你唱卡拉OK啦……」意思係，既然係攜手踏入新階段，雙方都會對彼此提要求，求其一方嘅唔尊重行徑，甚至夜生活多多，另一方都好難感覺受尊重，遑論安全感喇！
自佔中搞手扯上台獨人士，佢哋喺形象戰已經好被動，佔中本來喺法理基礎上已經受挑戰，依家搞手之一更公然同台獨派系交流，紅衫軍當年包圍台北總統府一帶、令台北市核心地帶陷入曠日持久癱瘓嘅一幕，港人記憶猶新，中環會否出現翻版呢？外力介入嘅佔中，港人同唔同意呢？佔中搞手恐要一一解說。
