改裝垃圾車易 擴建堆填區難
擴建堆填區計劃受到全城反對，港府到依家仲未死心，不斷諗計，不斷出招，希望稍後再向立法會闖關時可獲高抬貴手。呢，為求達到目的，當局居然出到資助垃圾車改裝呢一招，問你服未。
點樣資助呢？係咁嘅，當局計劃向立法會申請撥款二千萬元，明年一月起資助垃圾車加裝尾蓋及防滴漏裝置，變成全密封式垃圾車，每架車資助額最多五萬元。據講現時全港約有垃圾車五百幾架，其中二、三百架需要改裝，日後唔改裝嘅垃圾車禁止進入堆填區，違者罰款十萬喎。
即係咁，當局肯大破慳囊資助垃圾車改裝，減少臭味及污水滴漏，點都算係一件好事，問題係，呢類門面工夫治標唔治本，就算臭氣冚得住，對整體環境亦唔會有太大幫助，而垃圾更加唔會自動消失，堆填區遲早塞爆，試問到時又點算呢？再講吖，有關計劃只係當局一廂情願咋，業界會唔會同意，地區人士肯唔肯接受，立法會願唔願支持？仲係未知之數，最怕到頭來又係跪低，咁就好笑喇。
唔係太一叮潑冷水，減臭同減廢完全係兩回事，家陣香港每日製造固體廢物高達九千幾公噸，以每人平均計算，幾乎全球第一，搞到三個堆填區就快陸續爆棚。當局束手無策，一味識得擴建，點知出師不利，擴建計劃被迫一跪再跪。
好衰唔衰，呢頭堆填區擴建計劃跪低，嗰頭污水滲漏問題爆不停。嗱，打鼓嶺堆填區同新界西堆填區先後發現污水滲漏，嚴重影響環境，環保署先係秘而不宣，被踢爆後又前言不對後語，甚至玩弄文字遊戲，企圖隱瞞真相，證明當局根本冇誠意解決廢物問題。你話嘞，當局連污水滲漏問題都搞唔掂，市民又點可能支持擴建堆填區吖？
話到尾，政府解決廢物處理頭頭遇着黑，完全係咎由自取。咁多年來，當局嘅環保政策一味向錢看，膠袋稅、垃圾徵費等等，名目繁多，除咗向市民開刀之外，乜都唔識做。至於所謂源頭減廢、回收再造等等，純粹得把口齋噏，從來冇真正落實，反而急不及待推銷堆填區擴建計劃，結果引起全城反對，正一唔衰攞嚟衰。係人都知，香港地少人多，單靠堆填解決垃圾問題只有死路一條，與其擇惡固執，不如從善如流，盡快興建焚化爐，咁仲實際得多喇，叮！
