潮語「打大佬」嘅意思，唔係叫你就去做反骨仔打自己個大佬，又或者好似江湖電影咁起大佬飛腳自己起支旗做大佬。「打大佬」作潮語用即係挑戰最後難關咁解，又或者工作至最後階段，要開始動手做最後最難嘅部分。

記得以前大學時代有幾個讀化學系嘅同學，因為考試成績唔好，瀕臨踢出校嘅邊緣，被教授召見。當年呢位化學教授畀最後一次機會嗰幾位同學，要佢哋重讀一年，仲對佢哋講咗一句語重心長嘅說話：「Repeat？Not the end of the day！人生充滿波折，要學識Survive！」我嗰幾位同學，雖然Repeat咗一年，但最後都能夠順利畢業。雖然呢句說話唔係我親耳聽，但我都一直記喺心中。因為，離開大學出嚟社會，面對人心險惡同殘酷嘅生活，每每令人想起人生真係充滿波折，唔好話要生活，甚至求生存都唔係咁易。作為處身後主權移交時代嘅香港人，難關一浪接一浪，鑊鑊新鮮鑊鑊甘，家陣已經唔係適者生存咁簡單。遊戲規則話變就變，就算你乖乖哋勤勤力力循規蹈矩，都未必保證有得撈彈得起，反而有啲友靠父蔭食祖宗攀權貴，就繼續榮華富貴。普通人日日做嘢打完大佬又有大佬，打極都仲有！

點解難關又叫做大佬嘅呢？事緣「打大佬」呢句潮語係嚟自打機嘅，打過機嘅人都知好多遊戲都要過關，而每一關到最後都通常會出現一個超勁嘅強敵，要過關就要打低佢，最後要打爆機就要打贏隻更勁更難打嘅終極「大佬」。打機界亦會同時叫呢啲角色做「Boss」或者「大波士」。所以久而久之，當年沉迷打機嘅細路長大咗出嚟社會撈世界，就會將艱難嘅任務同工作比喻為「打大佬」。

自九七以來，相信香港人都有唔少集體「打大佬」嘅經驗，但最弊係過完一關又一關，點解都仲係未爆機？啲大佬Keep住嚟？之唔係因為香港呢個遊戲，根本就係終極屈機！最後「大佬」係不容許你班友挑機，想「打大佬」？打飛機就有你份！

第一手消息請下載on.cc東方互動iPhone/iPad/Android/Windows Phone Apps