SUN搞作：少膽虫手記：再也回不去了
半酣之間，突然有嘢頂住大陽穴，摸一摸，有隻手喺後面，但又唔似淫黎嗰隻甩皮兼粗糙嘅肥手……「你想瞓住咁死？」少膽虫睜開眼，一瞥，頭上面竟然有一把槍！
「你冷靜啲先，有咩慢慢講……」自命gentleman嘅少膽虫，嘗試緩和氣氛：「其實我唔介意做Mathilda身邊嘅Leono架……」話口未完，眼前人一巴冚來，回道：「宣淫販賤無謂拉人落水，連十九才子都忍唔到你啦！」少膽虫馬上扮喊：「你去到Leon嘅年紀，就會明白我都好唔開心……」
「呢招畀卡片蘇用到臭晒喇！」見佢咁寸，少膽虫忍唔住：「我都係搵食啫，咪抹煞我嘅正義好喎！」眼前人莞爾一笑，「正義？你連基本道德都冇！唔使擔心，末日來臨了。」槍上板鈕轉動，子彈「咔嚓」的聲音縈繞耳際，知道命仔垂危，少膽虫嚇到震晒：「A，何必呢？」
「砰！」巨響過後，一擘開眼，無數七色彩帶從槍口射出，觥籌交錯，如夢亦如電，難道少膽虫去咗天堂？頃刻，一腳旋風腿襲來，來不及反應，少膽虫便已插穿玻璃，朝堆填區飛去。
喺半空緩緩落下之時，少膽虫瞥見一條勾在領角的彩帶，寫着三字：「我．辭．職！」少膽虫好心痛，點解自己咁戇居？後生嗰陣唔試吓炒腦細魷？正如689呢刻好後悔冇批個牌出去一樣……
