政壇：善心李達三同情賊仔
豪宅爆竊案頻生，聲寶－樂聲（香港）創辦人李達三嘅居所早前亦遭賊人光顧，損失幾萬元金器擺設。李達三同太太李葉耀珍日前出席一個活動，問佢有冇受驚？李達三笑笑口話冇咩事，仲好豁達話自己冇乜財富，損失不大，仲幽默咁話同情賊人好辛苦添。
李達三（左）同太太李葉耀珍做得善事多，仲同情賊人好辛苦。
佢哋出席浙江省同鄉會聯合會（浙聯會）婦女委員會成立儀式，九十二歲高齡嘅李達三係浙聯會嘅創會會長，梗係熱心支持鄉里事務。講起單爆竊案，佢話工人朝早起身發現屋內好凌亂，當日有個保安休息，賊人先至有機可乘，佢哋事後已加強保安。浙聯會婦委會主席由香港中國旅行社總監應炳囡擔任，佢希望藉此凝聚浙江籍婦女力量，改善佢哋喺本港政治、經濟、法律同社會地位。
