政府熱廚房呢輪湧現跳船潮，三名政治助理相繼辭職，不過，都有人漏夜趕科場，政府尋日宣布，勞工及福利局政治助理將由齊心基金會原副行政總裁黎穎瑜接任，下月一日正式上任，莫宜端（Zandra）八月先以照顧仔女為由辭職，局長張建宗話咁快已搵到人接替，真係夠爽手。

三十六歲嘅黎穎瑜，二○○○年喺中文大學社會學系以一級榮譽畢業，同年獲頒羅德獎學金，到牛津大學修畢社會學碩士。佢做過理工大學及香港大學專業進修學院講師、電台節目主持、智經研究中心政策倡議總監，依家仲係文藝復興基金會副理事長。智經以至被視為挺梁嘅齊心基金會都係特首看重嘅智囊，相信呢個背景都為佢加分不少。

另一名因病請辭嘅新聞統籌專員鄧惠鈞（June）又搵到工作，政府尋日公布，接受佢擔任義務工作發展局成立嘅香港義工學會管理委員會成員，認為不會構成任何衝突。不過，大家似乎唔係關心阿June能否通過政府嘅再就業審批，而係極度關注佢嘅接任人係咪「三個字」言論而成名嘅南區區議員馮煒光囉！

第一手消息請下載on.cc東方互動iPhone/iPad/Android/Windows Phone Apps