政壇：金刀梁百無禁忌談生死
全港首間以家庭模式經營、專為晚期病人而設嘅寧養中心「善寧之家」前日喺沙田亞公角山道正式動工。財政司司長曾俊華、善寧會執行委員會主席王紹強、榮譽會長梁智鴻（金刀梁）、賽馬會董事葉澍堃等齊齊揸起泥鏟，主持動土儀式。喺醫療前線見盡生死嘅金刀梁坦言，生老病死係人生嘅一部分，冇必要避談，應該百無禁忌。
梁智鴻(右)同王紹強致力改善香港嘅善終服務。
金刀梁話，以前中國人敬畏鬼神，但現代人已經唔再怕講生死，唔少人仲會預先買定墓地、骨灰龕位添。佢又點呢？金刀梁笑笑口話：「未呀，啲（墓）地貴呀！」佢胞弟梁智仁日前獲委任為下屆醫院管理局主席，身為前主席嘅金刀梁有冇同弟弟溝通吓呢？佢就耍手擰頭話：「我都離開咗咁耐啦，每個人都有自己作風，唔干涉對方！」但佢話久唔久都有同弟弟食飯嘅。
善寧之家樓高四層、佔地五千平方米，由賽馬會慈善信託基金撥款一億七千多萬港元捐建，設有三十間設備完善嘅套房，每月房租約三萬港元，預料於二○一五年底竣工。
