政壇：黃建業嫁女送大磚頭
美聯太子女黃靜怡（Angela）上個禮拜六下嫁金融才俊楊志遠，黃家辦喜事，唔少親友專登喺外國飛返嚟，做外父嘅集團主席黃建業形容係「海陸空」出動，Angela嘅九十八歲婆婆，特地由美國飛嚟香港，飲孫女餐喜酒，呢個婚禮真可用高速、高效嚟形容！
黃靜怡同夫婿楊志遠係大學同學，上周攜手踏入人生新階段。
新娘係美聯副主席，出晒名工作勤力兼高效率，估唔到連搞婚禮都唔例外，當日佢哋由接新娘、向長輩敬茶、行禮簽字、宴客，下午三點幾就完成，據講連度蜜月都只得十日八日，因為新人趕住返香港做嘢喎！事實上，婚後第三日，新娘子已出現喺辦公室。Angela喜歡陽光，佢嘅婚禮亦特意揀喺下午喺戶外舉行，老竇黃建業開心到全程四萬咁口，有賓客透露，曾見到黃生拎住條手巾仔抹面，唔知係當日天氣熱，定係見到大女出閣感動到流淚呢？
娶得Angela嘅楊志遠同新娘子係大學同學，依家做緊私募基金。問到結婚禮物，Angela笑言，老竇最愛磚頭，送畀佢嘅嫁妝係「大磚頭」，而媽媽就送咗鑽石古董錶，希望能代代相傳，當日新娘子都有戴住出嫁！至於件嫁衣，為咗支持本土設計，Angela特登請本地設計師朱潔麗幫佢設計，簡約、典雅，果然好眼光。
