政壇：施榮懷打 僑牌逼菲道歉
馬尼拉人質事件迄今三年多，當日無辜死亡嘅港人及傷者至今都未能討回公道，面對香港人難以磨滅嘅傷痛，菲律賓總統阿基諾三世卻一再以狡猾、無賴嘅方式耍花招，堅持不向受害者及家屬道歉，社會上已有唔少制裁菲律賓嘅建議提出咗，中華廠商聯合會會長施榮懷認為，阿基諾必須為慘劇道歉，但就無必要斷絕港菲往來，佢話菲國有唔少福建人定居，好多人都對菲政府處理慘劇嘅態度好不滿，建議佢哋凝聚力量，向菲政府施壓，迫使阿基諾道歉。
設計圖片
施榮懷係本地福建幫嘅第二代翹楚，對閩籍嘅人與事認知梗係多啲，佢話菲律賓有唔少華人，而且多年前已有唔少福建人聚居，喺當地落地生根之餘仲促進咗經濟，對菲國有唔少貢獻，若果由當地華人發聲，向菲政府施壓，效果應該比香港市民發聲好得多。
唔贊成抵制菲傭
人質事件發生以來，菲律賓官方一直拖拖拉拉，近日又透過外交戰、傳媒戰矮化香港、欲蒙混過關，阿基諾三世嗰句「唔會為人哋嘅錯誤道歉」嘅說話更加傷透香港人嘅心。近日立法會有議員動議分三階段制裁菲律賓後，馬尼拉市議會立場卒之有軟化迹象，但阿基諾三世依然火上澆油話唔會由國家層面道歉，以致港人對菲律賓嘅負面情緒愈趨高漲。抵制菲傭、停止菲港經貿合作、藉以癱瘓菲國經濟嘅建議亦相繼提出。
施榮懷話，好似抵制菲傭來港，佢屋企本身都請咗兩個菲傭「姐姐」，服務咗佢哋一家七、八年，合約都續咗幾次，佢唔覺得有需要炒佢哋魷魚，至於要阿基諾三世向本港受害者道歉，當地人民嘅聲音同力量可能更加有力。
