冰鮮肉監管疏懶 食環署長期腐爛

食環署又衰乜呢？抵鬧咯，係關乎市民健康嘅食物安全問題吖。申訴專員公署主動抽查市面四十六間冰鮮肉店，發現其中超過六成有違規情況，包括將冰鮮雞隻放喺冇任何冷凍設施嘅膠箱出售，甚至裝假狗當鮮雞賣，魚目混珠，博懵掠水。嗱，有數得計，超過六成店舖違規，食環署係咪執法都執到手軟先？哈，點知公署踢爆，呢個大懶蛇部門舊年全年只係發出四次非正式口頭警告，四次口頭警告，而警告信更加係四年只得三次咁大把，平均一年一次都冇，你話食環官僚係唔係一班冬眠狀態嘅大懶蛇吖？

仲有吖，食環署唔止執法不力，巡查制度亦存在巨大漏洞。申訴專員公署批評，食環署有嚴謹法例，但冇嚴格執法，將九成冰鮮肉店歸入「低風險」類別，每二十個星期至巡查一次，執法粗疏。更離譜嘅係，就算有店舖被口頭警告，只要喺糾正時限兩天內作出改善，一般就唔會再覆檢，咁即係話，違規店舖隨時可以故態復萌，喺往後二十個星期不斷違規，令規管制度形同虛文。

講到呢度，太一叮突然見到一塊腐肉，一塊因為長期疏懶而變得霉爛不堪嘅官場腐肉。喂，食環官僚係咪食懵咗呀，係人都知，冰鮮肉處理不當會腐壞同變味，隨時令市民食物中毒，咁都可以對違規店舖視若無睹，心腸簡直仲冷過啲冰鮮肉吖。咁講啦，九成冰鮮店二十個星期巡查一次，唔係因為店舖低風險，而係食環官僚大食懶啫，出動巡查少啲咯，吞泡時間咪多啲囉，食物安唔安全，對唔住，佢哋懶得理，叮！

唉，食環署究竟幾時至改「蛇」歸正呢？幾時至唔再腐化落去呢？以前卓永興做署長係咁，依家梁卓文做阿頭又係咁，食環署成日畀人鬧大食懶，唔通真係一啲都唔覺得醜？你哋管食物安全吞泡失職，管環境衞生劣迹斑斑，管阻街路路不通，管排檔危機四伏，管蚊蟲蛇鼠一窩，管喪葬失禮死人……咁嘅部門仲可以繼續存在，咁嘅官僚仲可以尸位素餐，足證係港府嘅管理出咗大漏洞。

講開官僚尸位素餐，食環署前老頂周一嶽已經執包袱滾蛋，現任食衞局局長高永文如果繼續任由屬下烏煙瘴氣，咁點對得住市民畀你嘅高民望呀，叮！