城中鏡：王利民護鯊簽署唔食翅
政府禁毒廣告話「不可一，不可再」，喺康宏理財主席Quincy王利民眼中，仲有一樣嘢係唔可以做嘅，就係食魚翅！呢位搞作多多嘅公司主席，最近成為咗「一翅都唔食」（I'm FINished with Fins）全民運動嘅護鯊大使，仲喺公司嘅大會上簽咗企業承諾書，代表集團向公眾承諾停止食用魚翅。
護鯊行動亞太區董事呂子伯（中）見證王利民（左）簽署停食魚翅承諾書。
王利民以行動支持「一翅都唔食」運動。
Quincy唔係得個講字o架，原來佢已經三年無食魚翅喇！佢話喺參加同事嘅婚宴上面，會向同事表明自己唔食魚翅；喺公司嘅應酬中，都盡量避免食有魚翅嘅菜式咁話喎。為咗隆重其事，公司制訂咗一系列「無翅公務飲宴守則」，鼓勵員工關注保育鯊魚議題，原來魚翅已喺公司嘅餐單上面絕迹。
