城中鏡：邊行邊捽手指 蘇錦樑焦慮？
拖咗幾年，政府先至發出兩個免費電視新牌照，最終演變成一場政治風波，相信自稱盡晒力嘅商務及經濟發展局局長Greg蘇錦樑，心情肯定唔多好。
蘇錦樑（左）全程用左手捽擦右手尾指。
蘇錦樑（左）同曾裕彤（中）等一行三人邊行邊傾，愁眉深鎖。
蘇一行三人喺畢打街登上局長座駕離去。
上星期四下晝約兩點十五分，即政府公布發牌後兩日，阿Greg同政務助理曾裕彤等一行三人現身中環置地廣場，佢哋好似心事重重咁，一邊行一邊傾，仲皺晒眉頭，唔知係咪傾緊點拆彈呢？期間阿Greg猛用左手捽擦右手尾指，全程都冇放低隻手。
問過臨床心理學家林玥彤，佢話一個人如果重複做一個動作，如果唔係身體唔舒服，就係反映佢內心焦慮、緊張同恐懼，所以藉小動作紓緩上述情緒。至於不停捽手指，就要睇吓此人嘅身體健康狀況，例如可能覺得痕喎！
政助全程護駕
記者上前問阿Greg係咪食完飯？點知佢停都唔停吓，繼續向前行，幾秒後才漫不經心回頭，勉強擠出些少笑容話：「係呀！」再問佢免費電視牌照風波可以點拆彈？佢心情麻麻話：「可以講嘅都講晒！」跟住就走人，期間佢兩位助手竟上前隔開記者，急於幫上司開路。
原來啲政務官唔單止要做「狗仔隊」駐守立法會(目及)實議員出入，仲要做埋保安擋住記者採訪，正如公務員事務局局長鄧國威日前話齋，唔通做「保安」都係政務官經驗培訓嘅一部分？
