有個專欄作家，早前到過西貢一間法式小店食嘢，因好正，於是喺自己的框框地盤like讚幾句！點知，過幾日再去時，見店主一臉愁容，原來，該專欄見報後，惹來食環署日日來「掃場」！

西貢小墟，路闊人稀，又無車輛行走，所以，一些小食肆會在店外多擺一兩枱座位，倣效法國路邊茶座，讓顧客不必齋坐室內，反正安全又舒泰，既有風味特色，店舖亦可多做兩分錢生意，絕對係三贏局面！

哼！香港地就係咁！吖，應該說香港廢柴政府就係咁！專搞破壞！佢哋突然發現新大陸咁，按圖索驥，湧去「執法」，要「法式小店」不准「擺街」做生意，因食環署人員要「依足程序」、「跟足機制」辦事咁話！

那專欄作家見此情景，心感內疚，好似害咗呢間小店；其實，這不是專欄作家的錯，只是這兒的執法人員「無知無能無心」，但「有權」而已！

造成咁嘅狀況，全因政府的問責制度，學足大陸嗰套：「入常無罪，入局不死」，高層官員即使犯下彌天大罪，都可以從容無事，但下層低級職工執到一蚊不上繳，唔只無咗份工，連監都有得坐哩！唔揸正嚟做，係倒自己米也！仲有，現今有權力的人嘅judgement（判斷力）再無腦袋分析力，死板僵化，第一時間只諗自己利弊，不理公義和未來影響，最佳的例子，就係班揸住胡椒噴霧嘅差人，向手無寸鐵嘅示威者「施暴」，喂！大佬！人家正為香港的未來爭取福祉，你班差佬及家屬有份享的！唔諗囉！依程序機制order辦事！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps