政壇：鍾震峰開新檔猛學煮麵
拉麵店開到一街都係，可想而知競爭幾咁激烈，但稻香偏向虎山行，仲由太子爺Terry鍾震峰擔大旗，話晒係佢第一個Project，真係唔敢怠慢，為咗搞好呢檔新業務，佢話已經好多個月冇假放，成日都匿喺舖頭煮麵喎！
鍾震峰（左）話為咗麵店冇放過假。
稻香引入嘅日本麵店RingerHut今個月已經開業，過去幾年喺連鎖快餐店「偷師」嘅Terry話，今年一月先返番嚟稻香幫手，好畀心機搞o架！除咗落力學煮靚麵之外，佢仲好落力去sell間麵店，RingerHut呢個品牌喺日本已經有五十幾年歷史，有超過五百間舖頭。
Terry話隨住依家香港人愈來愈重視健康飲食，覺得係時候引入呢種多菜少肉嘅長崎Champon日本麵嚟香港，而且價錢相當實惠，所以相信會吸引到年輕人。講到有乜嘢目標，佢就笑笑口話每日賣六百碗麵喎，依家已經做到每日超過六轉客，相信好快就達標喇。
講到稻香原有嘅中式酒樓生意，行政總裁梁耀進就話下半年整體嘅同店銷售情況有改善，但仍然係下跌，所以明年有機會加價百之二至百分之三。
