政壇：吳得掂無料講幼園廢噏
被嘲為「吳得掂」嘅教育局局長吳克儉，早前發表嘅「排隊正常論」同「北區學額足夠論」已觸發大批本地家長反感，早前佢公布喺北區及大埔幼稚園推出「六招」，喺解釋其中一招即「一人一位」時將十二月中舉行嘅「統一登記日」講錯咗做「臨時註冊日」，令人非常混淆，仲搞到教育局之後要另外安排兩個官員先後幫佢解畫。
設計圖片及對白
吳得掂幾乎次次公開講嘢都唔多掂，於是早幾日見完上水粉嶺媽媽會代表後就選擇「走後門」速逃，唔接受記者訪問以圖減低再出錯嘅機會，改由教育局新聞組「補飛」代為以書面發言，當中提到「初步有五間幼稚園表示會考慮動用空置課室或改建課室以增加學位……另外有一個辦學團體最近已響應教育局的措施，計劃於新學年在上水開設一所新幼稚園……教育局將全力跟進有關工作」。
問責局長齋坐冷氣房？
避得一次避唔到第二次，吳得掂尋日主持幼稚園教育國際論壇開幕禮後就焗住當面向傳媒發言，仲自動波話：「我亦很高興，根據報道，其中一間幼稚園希望建立一所新的幼稚園」。究竟吳得掂係咪要睇報紙接收「二手料」先知幼稚園發生緊咩事呢？
當被記者追問新措施係咪只額外提供多幾十個位時，吳得掂不但無乘機糾正理應是會多幾百個學額，仲要講一大堆說話「兜圈」後，再一次引述報道話：「有報道說會有百分之五至百分之十的額外位數出現，我認為報道所說是有可能的」。其實，吳得掂身為問責局長，係咪乜都唔知，只係坐喺冷氣房內分析報紙內容係咪有可能發生嘅呢！佢擔大旗負責檢討十五年免費教育嘅可行性，如果佢要靠二手料就真係死得喇！
