電視風波禍早種 前朝政府責難逃
增發免費電視牌照餘波未了，圍攻港府嘅戲碼日日上演，真係仲好睇過公仔箱嘅肥皂劇。真人版電視風雲戲味十足，最新出場嘅係邊個呢？滑稽咯，係有甩嘴金句王之稱嘅前政務司司長唐英年。
唐唐話喎，公眾對事件有合理期望，喺不違反行政會議保密制下，港府有需要進一步解釋發牌「三變二」嘅原因，所以，佢認為「政府欠市民一個交代」喎。不過，當記者問佢當年行會係咪同意發三個牌時，佢居然又搵行會保密制做擋箭牌，拒絕回應。
你話係咪滑稽吖？電視發牌風波不斷，正正就係上屆政府留低嘅爛攤子，唐唐身為前朝老二，唔係出嚟鞠躬道歉，反而說三道四，煽風點火，落井下石，咁何止係虛偽，簡直係無賴！
之但係咁，唐唐當官時出名吊吊揈，返工記掛嘅只有紅酒、瞓覺同睇住一張神秘梳化發呆，今日當正自己置身事外，關人個關，係一啲都唔出奇嘅。太一叮只係想問吓佢，當年決定開放市場嘅係咪你哋呀？審批嘅係咪你哋呀？一直拖延唔公布嘅又係咪你哋呀？如果答案全部都係，咁欠市民一個交代嘅，又點止本屆政府吖，叮！
一句講晒，來說是非者，便是是非人。前朝政府對發牌爭議負有無可推諉嘅責任，吟詩都吟唔甩o架嘞，問題係，電視風雲搞到滿城風雨，除咗上屆政府陰濕，都要無能嘅今屆政府配合至得。發牌突然三變二，居然連一個令人信服嘅解釋都冇，唔激到人上街至奇啦。嗱，唐唐因為醜聞纏身而敗走特首選舉，都叫做死因清晰，無話可說吖，競牌落選者至今死得不明不白，難怪民意躁動，群情洶湧o架，事關大家捍衞嘅唔係個人，而係香港賴以成功嘅法治制度。
咁講啦，發牌風波係一齣政治低俗鬧劇，將上屆政府嘅無賴，今屆政府嘅無能，統統展現得活靈活現。至於厚顏抽水嘅前朝高官咯喎，就係鬧劇中嘅丑角。其實，電視風雲唔止映照出兩個政府嘅本相，更加折射出當前香港管治嘅本質。點解香港亂象紛呈？咪就係上屆政府陰陰濕濕埋地雷，今屆政府渾渾噩噩拆唔掂囉，房屋問題尾大不掉，雙非問題遺禍不斷，教育問題積弊難除，有邊樣唔係上屆政府留低嘅爛攤子？又有邊樣唔係炸到今屆政府焦頭爛額吖？戲爛無眼睇，唔知呢套政治鬧劇幾時收科呢？叮！
