城中鏡：買耳筒唔使貴 黃志祥精明

800蚊搞掂 唔盲目追潮

早幾日中午就見到Robert現身中環太子大廈，直行直入二樓一間影音店，專心揀耳筒試戴。佢好快就睇中一個銀黑色嘅無線耳筒，店員趨前耐心講解產品特色，睇嚟個耳筒幾啱Robert心水，售價八百元亦唔算好貴，所以佢好爽快拍板，畀咗錢後拎住「新歡」離去。

記者上前同佢打招呼，佢保持燦爛笑容同禮貌，心情好好。問佢近排忙啲乜嘢？果然冇錯，佢話忙緊科學園附近白石角嘅樓盤。咁買耳筒會點用？佢笑笑口話買嚟喺房間睇電視時用，靜啲喎！咦，唔通佢怕嘈住老婆瞓覺？佢笑騎騎，冇回答，跟住佢就落樓下等座駕。

呢款無線耳筒夠晒方便，只需事先叉足電，即可遠距離享受音樂同電視，就算喺深夜，將電視或音樂開到大大聲，都唔怕嘈親人。依家市面上好多耳筒動輒幾千元，大把年輕人爭住買，Robert貴為地產商，身家數以百億元計，但係佢都只係買幾百蚊嘅耳筒，唔會一味追求潮流時款。呢種消費態度，好值得時下年輕人學吓。