SUN搞作：打橫嚟講：香港政府做不來的十件小事
香港一批永遠心繫特區政府的大好友，日日大聲疾呼畀機會啲官員做嘢，晚晚發夢囈叫「唔畀佢哋試吓，點知佢哋做唔嚟呢？」咁話！
好啦！咪話我哋「舊香港人」唔包容，現係咁意列舉十單細哎嘢，睇吓呢個廢柴政府有乜本事、同用幾多時間至搞得掂：
一、通街違例巨型招牌懸掛舊樓外牆，隨時崩塌倒冧跌下，政府話拆話拆，講咗N年，有啲舖頭執笠幾世紀，但個大招牌仲吊在半空，唔知，政府搞得掂嗎？
二、通街違法的商業易拉架堵塞道路，唔知點解政府會束手無策十多年，無人識妥善處理！
三、用電話推銷的騷擾，即使用「真人發聲」，也極具討厭和不道德，究竟香港廢柴政府包庇佢哋到幾時？
四、新界僭建問題，何解突然靜晒？係問題解決咗？若未的話，點解會不了了之？
五、垃圾堆填區的臭味、擴建、烏蠅老鼠亂飛橫行，又如何處置？
六、雙非兒童（包括佢哋父母）的「後遺症」陸續浮現，由床位、奶粉、學額到長大成人……政府有長遠計劃應對？
七、大陸遊客的不文明行為，影響香港市容同衞生，香港庸官只翹埋手食花生？乜都做唔到！
八、如何才可停止問責官員再出醜出事？即「源頭減廢」！
九、唔係好明，點解全港煙民都可以好容易買到「私煙」，香港政府點做嘢？
十、嗱！最易做的一單小事，就係呢班廢柴庸官幾時全部×街消失晒，讓香港希望重燃，有好日子過！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
