政壇：徒弟做到嘢羅拔遜安慰
殿堂級對沖基金經理、老虎基金創辦人羅拔遜（Julian Robertson）早已金盆洗手，但一言一行依然好有影響力。佢最近接受金融招聘網OneWire訪問，畀業界一啲揀蟀貼士，對於自己嘅徒弟，梗係有讚冇彈，佢自言老懷安慰，自己愛錫嘅一班徒弟能夠做出咁好成績，令佢好自豪！
羅拔遜教路，對沖基金經理最重要嘅特質係醒目同埋誠實，緊隨其後至係競爭力，「嗰啲到依家未輸過嘅人，將來都唔會衰」！
佢當年揸弗嘅Tiger Management，可謂世界首屈一指嘅對沖基金，同國際投資者索羅斯嘅量子基金齊名，頂峰時期所管理嘅資產高達二百二十億美元！最經典嘅莫過於九七年夥拍一眾行家攻擊香港嘅聯匯制度，搞到特區政府用成千億去對付，後來老虎基金因投資日圓同埋全美航空失誤而勁蝕，被迫○○年解散。
羅拔遜隨後交由佢手下嘅老虎仔延續佢嘅傳奇，佢門生Philippe Laffont同埋Lee Ainslie分別主理嘅Coatue Management同Maverick Capital，今時今日打入最成功對沖基金之列。
