雖然區議會種票事件喺兩年前發生,警方同廉政公署都查得七七八八,但尋日立法會開政制事務委員會,傾政府建議修例取消虛報地址罪行嘅檢控期限,咁樣就辣着咗議員Ann蔣麗芸。

蔣麗芸

阿Ann話唔少人登記咗做選民,但係唔記得搬屋之後更改地址,就畀人話種票,嚇到啲市民唔敢登記做選民,仲話「你依家係有把刀,得閒睇你邊個唔順眼,就檢查你過去有冇幾個月之內冇改地址,唔喜歡你邊個就拉,告你刑事罪,質你坐六個月監」。

政制及內地事務局局長譚志源聽完,都好禮貌咁糾正阿Ann,話其實依家修例係針對虛假陳述,而唔係無更新地址,叫佢唔好攪亂。仲有,其實睇番資料,咁多單種票案件,最高都只係判四個月監,而無阿Ann所講嘅六個月咁多。

點知阿Ann都係唔滿意,又唉聲嘆氣話政府對佢嘅問題無答案,佢嘅黨友、委員會主席譚耀宗都頂佢唔順,笑佢「即係你自己理唔理解得到」,一句就KO咗阿Ann,佢至收口唔再糾纏落去。

第一手消息請下載on.cc東方互動iPhone/iPad/Android/Windows Phone Apps