政壇：立會座椅專恰瘦人
若果大家仲記得嘅話，當年立法會舊大樓會議廳嘅議員座椅經常畀議員投訴，話又窄又唔舒服，點知搬咗去添馬艦新立法會大樓後仲大鑊，唔少議員坐到腰痛，仲搞到要睇醫生。
設計圖片及對白
話說繼議員葛珮帆（EQ）、謝偉銓相繼因為喺立法會坐到腰痛要針灸同睇脊醫後，法律界Dennis郭榮鏗亦中招，仲睇脊醫睇咗幾個月，要用儀器「鑽」番鬆啲肌肉添。不過，話時話，投訴新座椅唔舒服嘅都係啲高高瘦瘦嘅議員，唔通呢張櫈淨係啱肥人坐？
EQ要針灸 高佬賢難捱
立法會搬去新大樓時，秘書處特登搵咗當時嘅行政管理委員會成員「象哥」黃定光、同埋議員「肥根」黃容根等有「分量」議員去試櫈，務求令議員坐得舒舒服服，故此即使有「肥峰」之稱嘅新議員張華峰都對依家張座椅幾滿意。咦！佢哋都係有番咁上下磅數嘅人，當然感覺差唔多喇。
之不過，似乎新座椅滿足唔到所有議員，好似郭榮鏗咁，就因為早排拉布時坐得多，搞到條腰痛到郁唔到，到依家都仲睇緊脊醫。另一名議員Ann蔣麗芸同「高佬賢」何俊賢亦都成日話張櫈坐得唔舒服，頂唔順要行出會議廳舒展筋骨。
咁啱得咁蹺，投訴新座椅嘅都係高高瘦瘦嘅議員，睇嚟立法會如果再換議員座椅嘅話，就要搵齊高矮肥瘦嘅議員去試坐至得，又或者班高高瘦瘦嘅議員增磅到好似象哥同肥峰咁，先坐得舒服嘞！
