機場洗手竟播毒 香港乜架都丟晒
「千祈千祈千祈，洗手洗手洗手！」自從沙士期間，前特首夫人董太爆出呢句金句之後，洗手已經成為抗疫嘅基本動作，洗手液更加變咗對付病菌嘅重要武器。但係大家有冇諗過，洗手液可以消毒變播毒，閣下雙手會愈洗愈多細菌？
咁恐怖嘅洗手液邊度有？唔難搵o架，只要行入本港公營機構嘅公眾洗手間，就有一半機會遇到。嗱，本報從本港六間不同公營機構抽取洗手液樣本化驗，發現其中三個樣本含菌量嚴重超標，其中房委會轄下油塘大本型商場嘅樣本每克含菌量三百萬個，食環署轄下渣華道熟食中心嘅樣本每克含菌量三百二十萬個，而最離譜係香港國際機場，樣本每克含菌量三百四十萬個，比內地標準超標三千四百倍！
有冇搞錯呀，港府廣告成日叫人洗手，唔好做散播傳染病嘅幕後黑手，點知自己就係嗰個散播惡菌嘅幕後黑手，市民愈洗手，愈容易病到嘔。學傳染科醫生話齋，洗手液含菌可大可小o架，市民若手上有傷口，可能導致細菌感染發炎，免疫力差嘅人更會細菌入血，影響腎、肝及心臟功能，令內臟衰竭，甚至死亡。港產官僚不懂潔身自愛，仲隨時累市民禍從手入，簡直靠害。
洗手液暗藏惡菌，累及嘅唔止係市民健康，更加係香港形象。開講有話，機場係一個城市嘅門戶，遊客一入嚟，就見到香港藏污納垢，仲有乜形象可言呢。喂，荷里活巨片《變形金剛》來港取景遇上黑煞兄弟收陀地，已經影衰香港，如果遊客來港散心驚見黑心洗手液播惡菌，香港真係乜架都丟晒o架嘞。難怪有立法會議員對化驗結果表示震驚，直斥事件失禮香港，有損旅遊業形象。
唉，小小一樽洗手液，已經驗出官場充斥人形細菌，成個官僚機制朽壞不堪。外判商有外判商失職，官老爺有官老爺塞責，一句工作外判，連監管責任都外判埋，香港有乜辦法唔事事每況愈下，亂七八糟吖。機管局聲稱會更換消毒洗手液供旅客使用喎，計太一叮話齋，為免市民中招、香港丟架，更換含菌洗手液固然事不宜遲，不過更換失職官僚更加要快手囉。
其實，一節現而百節知，機場藏污納垢，成個香港何嘗唔係一樣？呢，單係街頭巷尾嘅衞生黑點已經多到嚇死人啦，再咁落去，香港遲早又淪為疫埠嘅咋，叮！
