SUN搞作：打橫嚟講：香港傳統文化入世遺
香港果然千真萬確的係一個國際大都會，即使一樁港人見怪不怪的傳統舊式小案件，也見報於國際傳媒，成為世界大新聞。
哼！呢單喺香港人心目中的碎料，早已習以為常啦！只不過鬼佬少見多怪，才大呼小叫啫！
這單嘢，又真係好鬼失禮，令香港蒙羞嘅！就係人家荷里活大製作《變形金剛》來港取景拍攝，竟有香港好漢抬一部打壞電視機和一堆破磚頭，去攝製現場——收陀地。
「收陀地」，係廣東俚語，即「收取保護費」，源起係一笪地方的「地頭蟲」，別號「陀地」。當班土豪惡霸出面勒索，便叫做「收陀地」。
「收陀地」，同就咁「勒索」或「收保護費」係有分別的。「勒索」和「收保護費」的手段和方法有很多，但「收陀地」卻有一種特定「儀式」的，就係啲歹徒會向被「勒索」的人送禮嘅，例如，過年時，佢哋會抬一盆枯得就死嘅爛桔放在人家店舖門前，話嚟恭賀，要店主「打賞」，收取「老毛」（即利市一封）。嗱！看呢單抬電視機和爛磚索價的做法，係典型的行緊蠱惑，用緊江湖規矩做嘢，正宗過正宗！
香港特區政府好應利用今次「國際大案」，一洗他們庸廢形象，除果斷破案，捉拿歹徒蠱惑仔之餘，還須將「收陀地」呢款逐漸消失的香港文化，申請入「世遺」，並請求荷里活大導改劇本將過程加入故事裏，「變形金剛」大戰「香港陀地」，把一樁損壞香港聲譽的醜態，變為「保育」的美事。不過，香港廢柴政府哪有相關懂得我這有智慧的創意吖？
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
