城中鏡：千億新抱暴走中環
烈日當空之下，竟然見到「千億新抱」徐子淇喺大街大巷拔足狂奔，究竟所為何事？原來尋日一間慈善賑災機構喺中環搞咗個籌款接力賽，邀請包括食物及衞生局局長高永文等政商界名人比併，徐子淇作為籌款委員會其中一員，佢仲同隊友齊齊化身孖寶兄弟（Mario），以一身紅噹噹醒神裝扮造型亮相，搶晒鏡！
徐子淇（右二）同隊友化身孖寶兄弟參賽，搶晒鏡。
高永文（右）同隊友羅榮生抬擔架床喪跑，頭髮都飛起晒就知佢幾落力啦。
孖寶兄弟造型省鏡
呢個Mario Look仲係由佢「發辦」o架添，希望用Mario打不死精神，響應番大會主題咁話喎！不過呢個嬌俏又省鏡嘅Mario仲係難掩貪靚本色，着住對時款內增高波鞋上陣，好彩都仲係健步如飛，最後以第九名、即係尾二衝線。
唔係運動型嘅徐子淇高呼辛苦，更自嘲拖累咗隊友。但佢話家中三名仔女都係運動型，兩個囡囡李晞彤同李晞兒都識得滑雪同游泳，就連只有兩歲多嘅囝囝李俊熹都識得騎馬。
徐子淇話：「囝囝好搞笑，坐喺馬上面戥吓戥吓，有扣安全帶同戴頭盔。男仔要畀佢跌吓先tough啲、強壯啲。」佢坦言上一輩湊小朋友多以「保護式」，但佢就認為要讓小朋友多嘗試。
