城中鏡：明年登六 彭太開心慶祝
女童軍總會日前選出名譽副會長Daisy何超鳳出任新一任香港總監，明年四月底就會接替現任嘅彭徐美雲。彭太同老公彭曉明尋日拍住拖現身跑馬地馬場，為佢哋一家共同擁有嘅愛駒「羅馬神駒」打氣，愛駒最後跑第三。問彭太卸任後有乜大計？佢笑言要準備「登六」喎。「登六」即係乜嘢呢？咪係迎接六十歲囉！
彭徐美雲（右）即將卸下重任，佢話以後可以多啲陪老公彭曉明（左）。
盧文端（左二）同太太（左一）、兒子金榮（右二）同長女金治享受天倫樂。
孫少文（右）同太太入馬場歎二人世界。
「一日女童軍 一世女童軍」
尋日彭太以新髮型加橙色套裝裙現身，令人眼前一亮，莫非佢搵到接班人後放下心頭大石，所以連精神都好咗？彭太話，雖然佢唔再做總監，但「一日女童軍，一世都係女童軍」，未來會繼續留喺會內協助會務。佢話一向都覺得Daisy好好，所以當日佢同副會長蔡關穎琴一齊提名Daisy做總監，結果對方以高票當選。而彭太自己就準備明年「登六」，即係六十大壽，佢自言呢件係喜事，諗住搞活動慶祝一番，睇嚟佢仲有排忙喎。
除咗彭生彭太入馬場晒溫馨之外，SML集團主席孫少文夫婦、「福建幫頭領」盧文端同太太、長女Esther盧金治同兒子盧金榮一家四口都入嚟湊熱鬧，支持愛駒「福建精神」出賽。
Esther話身為中華廠商聯合會副會長嘅老公吳永嘉要開會，所以冇得一齊入嚟喎，唔通係為咗年底嘅工展會而忙碌？
