政壇：搞搞政：告別「青年幫」施榮忻入股拍片
淡出青年工作多時嘅菁英會創會兼榮譽主席Jaime施榮忻，近排搖身一變做電影出品人，今年初投資八位數字，入股有逾三十年歷史嘅銀都機構有限公司。銀都係一間香港電影公司，近年拍過唔少大片，好處係紅色背景強，多年來拍住內地多家電影公司齊搵食。
設計圖片及對白
Jaime承認對電影唔多熟，但睇準內地富人漸多，兩餐不愁之餘，自然想搵娛樂填飽大腦，加上神州地大人又多，一套喺香港收三千萬元票房嘅戲，入到內地播兩播，閒閒哋收三億元人民幣。所以佢志不在小小嘅香港票房，拎晒中港播映權，先係生金蛋生意。佢入股後嘅頭炮，係兩部同中港著名演員合作嘅新戲，年底上畫，其中一部尋日喺北京開記者會，佢首次以出品人身份現身，同演員有講有笑。
投資電影，亦要講運氣。Jaime話就算套戲大賣，如果成本超高，賣個滿堂紅都未必帶挈出品人賺大錢，相反一套爆紅嘅低成本製作，反而賺到笑。咁拍乜戲最賺錢？佢話好多戲都想拍，但有一類一定唔拍，就係鬼片，事關佢好細膽喎！
其實，佢依家只剩下福建社團聯會青委會主任一職，下月八號任滿後，就全身告別「青年幫」，但佢又賣關子話，有合適崗位唔介意服務社會。全國青聯副主席之位就快換屆，四十五歲以下者都可競逐，話唔定佢抖一抖，再戰江湖都未定噃。
