政壇：黑英網上論政鑽研改圖
天文台前台長「黑英」林超英自從公開怒轟政府有意發展郊野公園係「思想癌細胞」後，終於成功搣甩「梁粉」稱號，除咗笑言還佢一個公道外，仲自稱「只係多事嘅書生」。不過，時下書生論政唔使用文房四寶嘅，一部電腦就得啦，佢閒時仲鑽研低級改圖軟件小畫家，增強「戰鬥力」添！
林超英除咗自學改圖，仲學埋跳舞。（資料圖片）
黑英退休後化身鍵盤戰士，透過網誌「草雲居」議事論事，早排為咗喺網誌展示高樓滿布穿插香港山脊線嘅幻想圖，不惜自學電腦軟件小畫家，幫港島「移花接木」移走咗兩棟高廈，呢張疑似遠眺維港圖像真度夠晒高。此外，早排佢又喺社交網站成立「香港郊野公園是我的呼吸空間」群組，至今已經有近一萬八千人次讚好，「鍵盤戰士」稱號唔係浪得虛名，仲好有號召力兼影響力。
除咗寫網誌，佢近來仲鑽研舞技，同太太學探戈（Tango）促進夫妻關係，佢慨嘆平日好忙，要靠參加舞蹈班喺舞台上同太太見番夠本，之前已經學咗牛仔、森巴、cha-cha等拉丁舞喇！原來黑英唔係宅男，反而仲好活躍添！
