呢排政圈喜事一單接一單，新民黨青年委員會主席甘文鋒尋日都喺社交網站上載同未婚妻Claire遠赴四川拍攝嘅雪山婚照，大晒兩人甜蜜一面。阿鋒話佢哋一邊坐車一邊搵靚景，分別去咗畢棚溝、卡龍溝同古冰川等地取景，足足用咗四日，先完成拍攝。

雖然現時正值秋天，但四川部分地勢較高嘅地區氣溫非常低，阿鋒話未婚妻Claire件婚紗較厚唔係好怕凍，休息時仲好開心咁喺雪地行來行去，反而自己着住嘅恤衫用料較薄，搞到喺影相時凍到震。雖然阿鋒同未婚妻已經拍足八年拖兼影埋結婚相，但佢話依家公務繁忙，加上未婚妻冇乘機「逼婚」，所以仍然未決定出年幾時會娶對方過門做甘太喎！

第一手消息請下載on.cc東方互動iPhone/iPad/Android/Windows Phone Apps