政壇：鬍鬚曾「集郵」癮斷纜

網誌冇得威威

美國聯邦政府關門就唔係第一次，但喺美國讀番書同住過嘅鬍鬚曾尋日就喺網誌話，今次見到一啲難逢一遇嘅事，話說訪問團去到某個部門嘅總部時，整座大樓除咗大樓正門嘅幾個保安之外，就乜人都冇。老實講，鬍鬚曾係習武之人，學過洪拳，應該唔會驚嘅。

最後嗰個部門嘅高層官員都有出嚟同鬍鬚曾會面，相亦有影到，但係人哋就講到明唔好公開，皆因按照當地法律，嗰名官員應該放緊假喎！唔知係邊個高層官員咁驚呢？既然對方講到咁白，鬍鬚曾當然唔敢晒張合照出嚟，冇得威喇！

雖則上個禮拜兩黨傾掂數，政府服務回復正常，但係鬍鬚曾都有感而發，因為其實今次國會通過嘅法案，只係將美國舉債能力維持到明年二月七日，同樣嘅爭拗好快又會出現，即係好似還緊信用卡最低還款額咁，但又繼續碌卡，國債話咁快就會超過十七萬億美元。佢透露，金管局一直有檢視本地銀行嘅資金來源，依家貸存比率大約係百分之七十二，表示銀行業仲保留一定比例嘅流動資金，應對資金外流風險，今年第二季度平均流動資金比率係百分之三十九，遠高於百分之二十五嘅最低要求。

鬍鬚曾又話，金管局早前宣布計劃明年推出「穩定資金措施」，相信會有二十家銀行或有需要增加資金規模，而現時市場上七千五百億港元嘅外匯基金票據，應該足夠做抵押品，從金管局獲取港元流動資金，不過佢都話「解鈴還須繫鈴人」，希望美國聯儲局盡快處理好呢個爛攤子。